Sančuari birra
Sančuari lea leamaš guovddáš čuojaheaddjin Sámis 40 jagi. Joavku debuterii 1984:s coverjoavkun ja šadde jođánit bivnnuhat daid energiijalaš čuojahemiid geažil main ovttastahtte árbevirolaš juoigama ja ođđaáigásaš musihkkastiilla. Jagiid mielde leat sii almmuhan musihka mas seaguhit sámi juoigama, rocka ja pop, mii lea leamaš veahkkin ođasmahttit ja loktet sámi musihka.Sin konsearttat leat dovddus “alljoikemis” ja loktemis feastamiela.
Beassášlávvardat 2025 šaddá čalmmustahttin go Sančuari lávke lávdái ÁVVUKONSERTII Guovdageainnus. Ávvukonseartta várás lea Sančuari ovttasbargan eará musihkkariiguin ja gelddolaš guosseartisttaiguin, mii lohpida earenoamáš vásáhusa gehččiide. Konsearttas šaddá ávvudeapmi joavkku rikkis historjjás, seammás go sáhttit vuordit ođđa musihkalaš vásáhusaid.
Mii illudit muitinveara eahkedii mas dievva energiija, nostalgiija ja musihkalaš magiija Sámi váimmus.